श्री त्रिपुरसुंदरी मानसपूजा स्तोत्रं

श्री त्रिपुरसुंदरी मानसपूजा स्तोत्रं

मम न भजनशक्तिः पादयोस्ते न भक्ति-
-र्न च विषयविरक्तिर्ध्यानयोगे न सक्तिः |
इति मनसि सदाहं चिंतयन्नाद्यशक्ते
रुचिरवचनपुष्पैरर्चनं संचिनोमि || 1 ||

व्याप्तं हाटकविग्रहैर्जलचरैरारूढदेवव्रजैः
पोतैराकुलितांतरं मणिधरैर्भूमीधरैर्भूषितं |
आरक्तामृतसिंधुमुद्धुरचलद्विचीचयव्याकुल-
-व्योमानं परिचिंत्य संततमहो चेतः कृतार्थीभव || 2 ||

तस्मिन्नुज्ज्वलरत्नजालविलसत्कांतिच्छटाभिः स्फुटं
कुर्वाणं वियदिंद्रचापनिचयैराच्छादितं सर्वतः |
उच्चैःशृंगनिषण्णदिव्यवनिताबृंदाननप्रोल्लस-
-द्गीताकर्णननिश्चलाखिलमृगं द्वीपं नमस्कुर्महे || 3 ||

जातीचंपकपाटलादिसुमनःसौरभ्यसंभावितं
ह्रींकारध्वनिकंठकोकिलकुहूप्रोल्लासिचूतद्रुमं |
आविर्भूतसुगंधिचंदनवनं दृष्टिप्रियं नंदनं
चंचच्चंचलचंचरीकचटुलं चेतश्चिरं चिंतय || 4 ||

परिपतितपरागैः पाटलक्षोणिभागो
विकसितकुसुमोच्चैः पीतचंद्रार्करश्मिः |
अलिशुकपिकराजीकूजितैः श्रोत्रहारी
स्फुरतु हृदि मदीये नूनमुद्यानराजः || 5 ||

रम्यद्वारपुरप्रचारतमसां संहारकारिप्रभ
स्फूर्जत्तोरणभारहारकमहाविस्तारहारद्युते |
क्षोणीमंडलहेमहारविलसत्संसारपारप्रद
प्रोद्यद्भक्तमनोविहार कनकप्राकार तुभ्यं नमः || 6 ||

उद्यत्कांतिकलापकल्पितनभःस्फूर्जद्वितानप्रभः
सत्कृष्णागरुधूपवासितवियत्काष्ठांतरे विश्रुतः |
सेवायातसमस्तदैवतगणैरासेव्यमानोऽनिशं
सोऽयं श्रीमणिमंडपोऽनवरतं मच्चेतसि द्योततां || 7 ||

क्वापि प्रोद्भटपद्मरागकिरणव्रातेन संध्यायितं
कुत्रापि स्फुटविस्फुरन्मरकतद्युत्या तमिस्रायितं |
मध्यालंबिविशालमौक्तिकरुचा ज्योत्स्नायितं कुत्रचि-
-न्मातः श्रीमणिमंदिरं तव सदा वंदामहे सुंदरं || 8 ||

उत्तुंगालयविस्फुरन्मरकतप्रोद्यत्प्रभामंडला-
-न्यालोक्यांकुरितोत्सवैर्नवतृणाकीर्णस्थलीशंकया |
नीतो वाजिभिरुत्पथं बत रथः सूतेन तिग्मद्युते-
-र्वल्गावल्गितहस्तमस्तशिखरं कष्टैरितः प्राप्यते || 9 ||

मणिसदनसमुद्यत्कांतिधारानुरक्ते
वियति चरमसंध्याशंकिनो भानुरथ्याः |
शिथिलितगतकुप्यत्सूतहुंकारनादैः
कथमपि मणिगेहादुच्चकैरुच्चलंति || 10 ||

भक्त्या किं नु समर्पितानि बहुधा रत्नानि पाथोधिना
किं वा रोहणपर्वतेन सदनं यैर्विश्वकर्माकरोत् |
आ ज्ञातं गिरिजे कटाक्षकलया नूनं त्वया तोषिते
शंभौ नृत्यति नागराजफणिना कीर्णा मणिश्रेणयः || 11 ||

विदूरमुक्तवाहनैर्विनम्रमौलिमंडलै-
-र्निबद्धहस्तसंपुटैः प्रयत्नसंयतेंद्रियैः |
विरिंचिविष्णुशंकरादिभिर्मुदा तवांबिके
प्रतीक्ष्यमाणनिर्गमो विभाति रत्नमंडपः || 12 ||

ध्वनन्मृदंगकाहलः प्रगीतकिंनरीगणः
प्रनृत्तदिव्यकन्यकः प्रवृत्तमंगलक्रमः |
प्रकृष्टसेवकव्रजः प्रहृष्टभक्तमंडलो
मुदे ममास्तु संततं त्वदीयरत्नमंडपः || 13 ||

प्रवेशनिर्गमाकुलैः स्वकृत्यरक्तमानसै-
-र्बहिःस्थितामरावलीविधीयमानभक्तिभिः |
विचित्रवस्त्रभूषणैरुपेतमंगनाजनैः
सदा करोतु मंगलं ममेह रत्नमंडपः || 14 ||

सुवर्णरत्नभूषितैर्विचित्रवस्त्रधारिभि-
-र्गृहीतहेमयष्टिभिर्निरुद्धसर्वदैवतैः |
असंख्यसुंदरीजनैः पुरस्थितैरधिष्ठितो
मदीयमेतु मानसं त्वदीयतुंगतोरणः || 15 ||

इंद्रादींश्च दिगीश्वरान्सहपरीवारानथो सायुधा-
-न्योषिद्रूपधरान्स्वदिक्षु निहितान्संचिंत्य हृत्पंकजे |
शंखे श्रीवसुधारया वसुमतीयुक्तं च पद्मं स्मर-
-न्कामं नौमि रतिप्रियं सहचरं प्रीत्या वसंतं भजे || 16 ||

गायंतीः कलवीणयातिमधुरं हुंकारमातन्वती-
-र्द्वाराभ्यासकृतस्थितीरिह सरस्वत्यादिकाः पूजयन् |
द्वारे नौमि मदोन्मदं सुरगणाधीशं मदेनोन्मदां
मातंगीमसितांबरां परिलसन्मुक्ताविभूषां भजे || 17 ||

कस्तूरिकाश्यामलकोमलांगीं
कादंबरीपानमदालसांगीं |
वामस्तनालिंगितरत्नवीणां
मातंगकन्यां मनसा स्मरामि || 18 ||

विकीर्णचिकुरोत्करे विगलितांबराडंबरे
मदाकुलितलोचने विमलभूषणोद्भासिनि |
तिरस्करिणि तावकं चरणपंकजं चिंतय-
-न्करोमि पशुमंडलीमलिकमोहदुग्धाशयां || 19 ||

प्रमत्तवारुणीरसैर्विघूर्णमानलोचनाः
प्रचंडदैत्यसूदनाः प्रविष्टभक्तमानसाः |
उपोढकज्जलच्छविच्छटाविराजिविग्रहाः
कपालशूलधारिणीः स्तुवे त्वदीयदूतिकाः || 20 ||

स्फूर्जन्नव्ययवांकुरोपलसिताभोगैः पुरः स्थापितै-
-र्दीपोद्भासिशरावशोभितमुखैः कुंभैर्नवैः शोभिना |
स्वर्णाबद्धविचित्ररत्नपटलीचंचत्कपाटश्रिया
युक्तं द्वारचतुष्टयेन गिरिजे वंदे मणीमंदिरं || 21 ||

आस्तीर्णारुणकंबलासनयुतं पुष्पोपहारान्वितं
दीप्तानेकमणिप्रदीपसुभगं राजद्वितानोत्तमं |
धूपोद्गारिसुगंधिसंभ्रममिलद्भृंगावलीगुंजितं
कल्याणं वितनोतु मेऽनवरतं श्रीमंडपाभ्यंतरं || 22 ||

कनकरचिते पंचप्रेतासनेन विराजिते
मणिगणचिते रक्तश्वेतांबरास्तरणोत्तमे |
कुसुमसुरभौ तल्पे दिव्योपधानसुखावहे
हृदयकमले प्रादुर्भूतां भजे परदेवतां || 23 ||

सर्वांगस्थितिरम्यरूपरुचिरां प्रातः समभ्युत्थितां
जृंभामंजुमुखांबुजां मधुमदव्याघूर्णदक्षित्रयां |
सेवायातसमस्तसंनिधिसखीः संमानयंतीं दृशा
संपश्यन्परदेवतां परमहो मन्ये कृतार्थं जनुः || 24 ||

उच्चैस्तोरणवर्तिवाद्यनिवहध्वाने समुज्जृंभिते
भक्तैर्भूमिविलग्नमौलिभिरलं दंडप्रणामे कृते |
नानारत्नसमूहनद्धकथनस्थालीसमुद्भासितां
प्रातस्ते परिकल्पयामि गिरिजे नीराजनामुज्ज्वलां || 25 ||

पाद्यं ते परिकल्पयामि पदयोरर्घ्यं तथा हस्तयोः
सौधीभिर्मधुपर्कमंब मधुरं धाराभिरास्वादय |
तोयेनाचमनं विधेहि शुचिना गांगेन मत्कल्पितं
साष्टांगं प्रणिपातमीशदयिते दृष्ट्या कृतार्थी कुरु || 26 ||

मातः पश्य मुखांबुजं सुविमले दत्ते मया दर्पणे
देवि स्वीकुरु दंतधावनमिदं गंगाजलेनान्वितं |
सुप्रक्षालितमाननं विरचयन्स्निग्धांबरप्रोंछनं
द्रागंगीकुरु तत्त्वमंब मधुरं तांबूलमास्वादय || 27 ||

निधेहि मणिपादुकोपरि पदांबुजं मज्जना-
-लयं व्रज शनैः सखीकृतकरांबुजालंबनं |
महेशि करुणानिधे तव दृगंतपातोत्सुका-
-न्विलोकय मनागमूनुभयसंस्थितांदैवतान् || 28 ||

हेमरत्नवरणेन वेष्टितं
विस्तृतारुणवितानशोभितं |
सज्जसर्वपरिचारिकाजनं
पश्य मज्जनगृहं मनो मम || 29 ||

कनककलशजालस्फाटिकस्नानपीठा-
-द्युपकरणविशालं गंधमत्तालिमालं |
स्फुरदरुणवितानं मंजुगंधर्वगानं
परमशिवमहेले मज्जनागारमेहि || 30 ||

पीनोत्तुंगपयोधराः परिलसत्संपूर्णचंद्रानना
रत्नस्वर्णविनिर्मिताः परिलसत्सूक्ष्मांबरप्रावृताः |
हेमस्नानघटीस्तथा मृदुपटीरुद्वर्तनं कौसुमं
तैलं कंकतिकं करेषु दधतीर्वंदेऽंब ते दासिकाः || 31 ||

तत्र स्फाटिकपीठमेत्य शनकैरुत्तारितालंकृति-
-र्नीचैरुज्झितकंचुकोपरिहितारक्तोत्तरीयांबरा |
वेणीबंधमपास्य कंकतिकया केशप्रसादं मना-
-क्कुर्वाणा परदेवता भगवती चित्ते मम द्योततां || 32 ||

अभ्यंगं गिरिजे गृहाण मृदुना तैलेन संपादितं
काश्मीरैरगरुद्रवैर्मलयजैरुद्वर्तनं कारय |
गीते किंनरकामिनीभिरभितो वाद्ये मुदा वादिते
नृत्यंतीमिह पश्य देवि पुरतो दिव्यांगनामंडलीं || 33 ||

कृतपरिकरबंधास्तुंगपीनस्तनाढ्या
मणिनिवहनिबद्धा हेमकुंभीर्दधानाः |
सुरभिसलिलनिर्यद्गंधलुब्धालिमालाः
सविनयमुपतस्थुः सर्वतः स्नानदास्यः || 34 ||

उद्गंधैरगरुद्रवैः सुरभिणा कस्तूरिकावारिणा
स्फूर्जत्सौरभयक्षकर्दमजलैः काश्मीरनीरैरपि |
पुष्पांभोभिरशेषतीर्थसलिलैः कर्पूरपाथोभरैः
स्नानं ते परिकल्पयामि गिरिजे भक्त्या तदंगीकुरु || 35 ||

प्रत्यंगं परिमार्जयामि शुचिना वस्त्रेण संप्रोंछनं
कुर्वे केशकलापमायततरं धूपोत्तमैर्धूपितं |
आलीबृंदविनिर्मितां यवनिकामास्थाप्य रत्नप्रभं
भक्तत्राणपरे महेशगृहिणि स्नानांबरं मुच्यतां || 36 ||

पीतं ते परिकल्पयामि निबिडं चंडातकं चंडिके
सूक्ष्मं स्निग्धमुरीकुरुष्व वसनं सिंदूरपूरप्रभं |
मुक्तारत्नविचित्रहेमरचनाचारुप्रभाभास्वरं
नीलं कंचुकमर्पयामि गिरिशप्राणप्रिये सुंदरि || 37 ||

विलुलितचिकुरेण च्छादितांसप्रदेशे
मणिनिकरविराजत्पादुकान्यस्तपादे |
सुललितमवलंब्य द्राक्सखीमंसदेशे
गिरिशगृहिणि भूषामंटपाय प्रयाहि || 38 ||

लसत्कनककुट्टिमस्फुरदमंदमुक्तावली-
-समुल्लसितकांतिभिः कलितशक्रचापव्रजे |
महाभरणमंडपे निहितहेमसिंहासनं
सखीजनसमावृतं समधितिष्ठ कात्यायनि || 39 ||

स्निग्धं कंकतिकामुखेन शनकैः संशोध्य केशोत्करं
सीमंतं विरचय्य चारु विमलं सिंदूररेखान्वितं |
मुक्ताभिर्ग्रथितालकां मणिचितैः सौवर्णसूत्रैः स्फुटं
प्रांते मौक्तिकगुच्छकोपलतिकां ग्रथ्नामि वेणीमिमां || 40 ||

विलंबिवेणीभुजगोत्तमांग-
-स्फुरन्मणिभ्रांतिमुपानयंतं |
स्वरोचिषोल्लासितकेशपाशं
महेशि चूडामणिमर्पयामि || 41 ||

त्वामाश्रयद्भिः कबरीतमिस्रै-
-र्बंदीकृतं द्रागिव भानुबिंबं |
मृडानि चूडामणिमादधानं
वंदामहे तावकमुत्तमांगं || 42 ||

स्वमध्यनद्धहाटकस्फुरन्मणिप्रभाकुलं
विलंबिमौक्तिकच्छटाविराजितं समंततः |
निबद्धलक्षचक्षुषा भवेन भूरि भावितं
समर्पयामि भास्वरं भवानि फालभूषणं || 43 ||

मीनांभोरुहखंजरीटसुषमाविस्तारविस्मारके
कुर्वाणे किल कामवैरिमनसः कंदर्पबाणप्रभां |
माध्वीपानमदारुणेऽतिचपले दीर्घे दृगंभोरुहे
देवि स्वर्णशलाकयोर्जितमिदं दिव्यांजनं दीयतां || 44 ||

मध्यस्थारुणरत्नकांतिरुचिरां मुक्तामुगोद्भासितां
दैवाद्भार्गवजीवमध्यगरवेर्लक्ष्मीमधः कुर्वतीं |
उत्सिक्ताधरबिंबकांतिविसरैर्भौमीभवन्मौक्तिकां
मद्दत्तामुररीकुरुष्व गिरिजे नासाविभूषामिमां || 45 ||

उडुकृतपरिवेषस्पर्धया शीतभानो-
-रिव विरचितदेहद्वंद्वमादित्यबिंबं |
अरुणमणिसमुद्यत्प्रांतविभ्राजिमुक्तं
श्रवसि परिनिधेहि स्वर्णताटंकयुग्मं || 46 ||

मरकतवरपद्मरागहीरो-
-त्थितगुलिकात्रितयावनद्धमध्यं |
विततविमलमौक्तिकं च
कंठाभरणमिदं गिरिजे समर्पयामि || 47 ||

नानादेशसमुत्थितैर्मणिगणप्रोद्यत्प्रभामंडल-
-व्याप्तैराभरणैर्विराजितगलां मुक्ताच्छटालंकृतां |
मध्यस्थारुणरत्नकांतिरुचिरां प्रांतस्थमुक्ताफल-
-व्रातामंब चतुष्किकां परशिवे वक्षःस्थले स्थापय || 48 ||

अन्योन्यं प्लावयंती सततपरिचलत्कांतिकल्लोलजालैः
कुर्वाणा मज्जदंतःकरणविमलतां शोभितेव त्रिवेणी |
मुक्ताभिः पद्मरागैर्मरकतमणिभिर्निर्मिता दीप्यमानै-
-र्नित्यं हारत्रयी ते परशिवरसिके चेतसि द्योततां नः || 49 ||

करसरसिजनाले विस्फुरत्कांतिजाले
विलसदमलशोभे चंचदीशाक्षिलोभे |
विविधमणिमयूखोद्भासितं देवि दुर्गे
कनककटकयुग्मं बाहुयुग्मे निधेहि || 50 ||

व्यालंबमानसितपट्टकगुच्छशोभि
स्फूर्जन्मणीघटितहारविरोचमानं |
मातर्महेशमहिले तव बाहुमूले
केयूरकद्वयमिदं विनिवेशयामि || 51 ||

विततनिजमयूखैर्निर्मितामिंद्रनीलै-
-र्विजितकमलनालालीनमत्तालिमालां |
मणिगणखचिताभ्यां कंकणाभ्यामुपेतां
कलय वलयराजीं हस्तमूले महेशि || 52 ||

नीलपट्टमृदुगुच्छशोभिता-
-बद्धनैकमणिजालमंजुलां |
अर्पयामि वलयात्पुरःसरे
विस्फुरत्कनकतैतृपालिकां || 53 ||

आलवालमिव पुष्पधन्वना
बालविद्रुमलतासु निर्मितं |
अंगुलीषु विनिधीयतां शनै-
-रंगुलीयकमिदं मदर्पितं || 54 ||

विजितहरमनोभूमत्तमातंगकुंभ-
-स्थलविलुलितकूजत्किंकिणीजालतुल्यां |
अविरतकलनदैरीशचेतो हरंतीं
विविधमणिनिबद्धां मेखलामर्पयामि || 55 ||

व्यालंबमानवरमौक्तिकगुच्छशोभि
विभ्राजिहाटकपुटद्वयरोचमानं |
हेम्ना विनिर्मितमनेकमणिप्रबंधं
नीवीनिबंधनगुणं विनिवेदयामि || 56 ||

विनिहतनवलाक्षापंकबालातपौघे
मरकतमणिराजीमंजुमंजीरघोषे |
अरुणमणिसमुद्यत्कांतिधाराविचित्र-
-स्तव चरणसरोजे हंसकः प्रीतिमेतु || 57 ||

निबद्धशितिपट्टकप्रवरगुच्छसंशोभितां
कलक्वणितमंजुलां गिरिशचित्तसंमोहनीं |
अमंदमणिमंडलीविमलकांतिकिम्मीरितां
निधेहि पदपंकजे कनकघुंघुरूमंबिके || 58 ||

विस्फुरत्सहजरागरंजिते
शिंजितेन कलितां सखीजनैः |
पद्मरागमणिनूपुरद्वयी-
-मर्पयामि तव पादपंकजे || 59 ||

पदांबुजमुपासितुं परिगतेन शीतांशुना
कृतां तनुपरंपरामिव दिनांतरागारुणां |
महेशि नवयावकद्रवभरेण शोणीकृतां
नमामि नखमंडलीं चरणपंकजस्थां तव || 60 ||

आरक्तश्वेतपीतस्फुरदुरुकुसुमैश्चित्रितां पट्टसूत्रै-
-र्देवस्त्रीभिः प्रयत्नादगरुसमुदितैर्धूपितां दिव्यधूपैः |
उद्यद्गंधांधपुष्पंधयनिवहसमारब्धझांकारगीतां
चंचत्कह्लारमालां परशिवरसिके कंठपीठेऽर्पयामि || 61 ||

गृहाण परमामृतं कनकपात्रसंस्थापितं
समर्पय मुखांबुजे विमलवीटिकामंबिके |
विलोकय मुखांबुजं मुकुरमंडले निर्मले
निधेहि मणिपादुकोपरि पदांबुजं सुंदरि || 62 ||

आलंब्य स्वसखीं करेण शनकैः सिंहासनादुत्थिता
कूजन्मंदमरालमंजुलगतिप्रोल्लासिभूषांबरा |
आनंदप्रतिपादकैरुपनिषद्वाक्यैः स्तुता वेधसा
मच्चित्ते स्थिरतामुपैतु गिरिजा यांती सभामंडपं || 63 ||

चलंत्यामंबायां प्रचलति समस्ते परिजने
सवेगं संयाते कनकलतिकालंकृतिभरे |
समंतादुत्तालस्फुरितपदसंपातजनितै-
-र्झणत्कारैस्तारैर्झणझणितमासीन्मणिगृहं || 64 ||

चंचद्वेत्रकराभिरंगविलसद्भूषांबराभिः पुरो-
-यांतीभिः परिचारिकाभिरमरव्राते समुत्सारिते |
रुद्धे निर्जरसुंदरीभिरभितः कक्षांतरे निर्गतं
वंदे नंदितशंभु निर्मलचिदानंदैकरूपं महः || 65 ||

वेधाः पादतले पतत्ययमसौ विष्णुर्नमत्यग्रतः
शंभुर्देहि दृगंचलं सुरपतिं दूरस्थमालोकय |
इत्येवं परिचारिकाभिरुदिते संमाननां कुर्वती
दृग्द्वंद्वेन यथोचितं भगवती भूयाद्विभूत्यै मम || 66 ||

मंदं चारणसुंदरीभिरभितो यांतीभिरुत्कंठया
नामोच्चारणपूर्वकं प्रतिदिशं प्रत्येकमावेदितान् |
वेगादक्षिपथं गतान्सुरगणानालोकयंती शनै-
-र्दित्संती चरणांबुजं पथि जगत्पायान्महेशप्रिया || 67 ||

अग्रे केचन पार्श्वयोः कतिपये पृष्ठे परे प्रस्थिता
आकाशे समवस्थिताः कतिपये दिक्षु स्थिताश्चापरे |
संमर्दं शनकैरपास्य पुरतो दंडप्रणामान्मुहुः
कुर्वाणाः कतिचित्सुरा गिरिसुते दृक्पातमिच्छंति ते || 68 ||

अग्रे गायति किंनरी कलपदं गंधर्वकांताः शनै-
-रातोद्यानि च वादयंति मधुरं सव्यापसव्यस्थिताः |
कूजन्नूपुरनादमंजु पुरतो नृत्यंति दिव्यांगना
गच्छंतः परितः स्तुवंति निगमस्तुत्या विरिंच्यादयः || 69 ||

कस्मैचित्सुचिरादुपासितमहामंत्रौघसिद्धिं क्रमा-
-देकस्मै भवनिःस्पृहाय परमानंदस्वरूपां गतिं |
अन्यस्मै विषयानुरक्तमनसे दीनाय दुःखापहं
द्रव्यं द्वारसमाश्रिताय ददतीं वंदामहे सुंदरीं || 70 ||

नम्रीभूय कृतांजलिप्रकटितप्रेमप्रसन्नानने
मंदं गच्छति संनिधौ सविनयात्सोत्कंठमोघत्रये |
नानामंत्रगणं तदर्थमखिलं तत्साधनं तत्फलं
व्याचक्षाणमुदग्रकांति कलये यत्किंचिदाद्यं महः || 71 ||

तव दहनसदृक्षैरीक्षणैरेव चक्षु-
-र्निखिलपशुजनानां भीषयद्भीषणास्यं |
कृतवसति परेशप्रेयसि द्वारि नित्यं
शरभमिथुनमुच्चैर्भक्तियुक्तो नतोऽस्मि || 72 ||

कल्पांते सरसैकदासमुदितानेकार्कतुल्यप्रभां
रत्नस्तंभनिबद्धकांचनगुणस्फूर्जद्वितानोत्तमां |
कर्पूरागरुगर्भवर्तिकलिकाप्राप्तप्रदीपावलीं
श्रीचक्राकृतिमुल्लसन्मणिगणां वंदामहे वेदिकां || 73 ||

स्वस्थानस्थितदेवतागणवृते बिंदौ मुदा स्थापितं
नानारत्नविराजिहेमविलसत्कांतिच्छटादुर्दिनं |
चंचत्कौसुमतूलिकासनयुतं कामेश्वराधिष्ठितं
नित्यानंदनिदानमंब सततं वंदे च सिंहासनं || 74 ||

वदद्भिरभितो मुदा जय जयेति बृंदारकैः
कृतांजलिपरंपरा विदधति कृतार्था दृशा |
अमंदमणिमंडलीखचितहेमसिंहासनं
सखीजनसमावृतं समधितिष्ठ दाक्षायणि || 75 ||

कर्पूरादिकवस्तुजातमखिलं सौवर्णभृंगारकं
तांबूलस्य करंडकं मणिमयं चैलांचलं दर्पणं |
विस्फूर्जन्मणिपादुके च दधतीः सिंहासनस्याभित-
-स्तिष्ठंतीः परिचारिकास्तव सदा वंदामहे सुंदरि || 76 ||

त्वदमलवपुरुद्यत्कांतिकल्लोलजालैः
स्फुटमिव दधतीभिर्बाहुविक्षेपलीलां |
मुहुरपि च विधूते चामरग्राहिणीभिः
सितकरकरशुभ्रे चामरे चालयामि || 77 ||

प्रांतस्फुरद्विमलमौक्तिकगुच्छजालं
चंचन्महामणिविचित्रितहेमदंडं |
उद्यत्सहस्रकरमंडलचारु हेम-
-च्छत्रं महेशमहिले विनिवेशयामि || 78 ||

उद्यत्तावकदेहकांतिपटलीसिंदूरपूरप्रभा-
-शोणीभूतमुदग्रलोहितमणिच्छेदानुकारिच्छवि |
दूरादादरनिर्मितांजलिपुटैरालोक्यमानं सुर-
-व्यूहैः कांचनमातपत्रमतुलं वंदामहे सुंदरं || 79 ||

संतुष्टां परमामृतेन विलसत्कामेश्वरांकस्थितां
पुष्पौघैरभिपूजितां भगवतीं त्वां वंदमाना मुदा |
स्फूर्जत्तावकदेहरश्मिकलनाप्राप्तस्वरूपाभिदाः
श्रीचक्रावरणस्थिताः सविनयं वंदामहे देवताः || 80 ||

आधारशक्त्यादिकमाकलय्य
मध्ये समस्ताधिकयोगिनीं च |
मित्रेशनाथादिकमत्र नाथ-
-चतुष्टयं शैलसुते नतोऽस्मि || 81 ||

त्रिपुरासुधार्णवासन-
-मारभ्य त्रिपुरमालिनी यावत् |
आवरणाष्टकसंस्थित-
-मासनषट्कं नमामि परमेशि || 82 ||

ईशाने गणपं स्मरामि विचरद्विघ्नांधकारच्छिदं
वायव्ये वटुकं च कज्जलरुचिं व्यालोपवीतान्वितं |
नैरृत्ये महिषासुरप्रमथिनीं दुर्गां च संपूजय-
-न्नाग्नेयेऽखिलभक्तरक्षणपरं क्षेत्राधिनाथं भजे || 83 ||

उड्यानजालंधरकामरूप-
-पीठानिमान्पूर्णगिरिप्रसक्तान् |
त्रिकोणदक्षाग्रिमसव्यभाग-
-मध्यस्थितान्सिद्धिकरान्नमामि || 84 ||

लोकेशः पृथिवीपतिर्निगदितो विष्णुर्जलानां प्रभु-
-स्तेजोनाथ उमापतिश्च मरुतामीशस्तथा चेश्वरः |
आकाशाधिपतिः सदाशिव इति प्रेताभिधामागता-
-नेतांश्चक्रबहिःस्थितान्सुरगणान्वंदामहे सादरं || 85 ||

तारानाथकलाप्रवेशनिगमव्याजाद्गतासुप्रथं
त्रैलोक्ये तिथिषु प्रवर्तितकलाकाष्ठादिकालक्रमं |
रत्नालंकृतिचित्रवस्त्रललितं कामेश्वरीपूर्वकं
नित्याषोडशकं नमामि लसितं चक्रात्मनोरंतरे || 86 ||

हृदि भावितदैवतं प्रयत्ना-
-भ्युपदेशानुगृहीतभक्तसंघं |
स्वगुरुक्रमसंज्ञचक्रराज-
-स्थितमोघत्रयमानतोऽस्मि मूर्ध्ना || 87 ||

हृदयमथ शिरः शिखाखिलाद्ये
कवचमथो नयनत्रयं च देवि |
मुनिजनपरिचिंतितं तथास्त्रं
स्फुरतु सदा हृदये षडंगमेतत् || 88 ||

त्रैलोक्यमोहनमिति प्रथिते तु चक्रे
चंचद्विभूषणगणत्रिपुराधिवासे |
रेखात्रये स्थितवतीरणिमादिसिद्धी-
-र्मुद्रा नमामि सततं प्रकटाभिधास्ताः || 89 ||

सर्वाशापरिपूरके वसुदलद्वंद्वेन विभ्राजिते
विस्फूर्जंत्रिपुरेश्वरीनिवसतौ चक्रे स्थिता नित्यशः |
कामाकर्षणिकादयो मणिगणभ्राजिष्णुदिव्यांबरा
योगिन्यः प्रदिशंतु कांक्षितफलं विख्यातगुप्ताभिधाः || 90 ||

महेशि वसुभिर्दलैर्लसति सर्वसंक्षोभणे
विभूषणगणस्फुरंत्रिपुरसुंदरीसद्मनि |
अनंगकुसुमादयो विविधभूषणोद्भासिता
दिशंतु मम कांक्षितं तनुतराश्च गुप्ताभिधाः || 91 ||

लसद्युगदृशारके स्फुरति सर्वसौभाग्यदे
शुभाभरणभूषितत्रिपुरवासिनीमंदिरे |
स्थिता दधतु मंगलं सुभगसर्वसंक्षोभिणी-
-मुखाः सकलसिद्धयो विदितसंप्रदायाभिधाः || 92 ||

बहिर्दशारे सर्वार्थसाधके त्रिपुराश्रयाः |
कुलकौलाभिधाः पांतु सर्वसिद्धिप्रदायिकाः || 93 ||

अंतःशोभिदशारकेऽतिललिते सर्वादिरक्षाकरे
मालिन्या त्रिपुराद्यया विरचितावासे स्थितं नित्यशः |
नानारत्नविभूषणं मणिगणभ्राजिष्णु दिव्यांबरं
सर्वज्ञादिकशक्तिबृंदमनिशं वंदे निगर्भाभिधं || 94 ||

सर्वरोगहरेऽष्टारे त्रिपुरासिद्धयान्विते |
रहस्ययोगिनीर्नित्यं वशिन्याद्या नमाम्यहं || 95 ||

चूताशोकविकासिकेतकरजःप्रोद्भासिनीलांबुज-
-प्रस्फूर्जन्नवमल्लिकासमुदितैः पुष्पैः शरान्निर्मितान् |
रम्यं पुष्पशरासनं सुललितं पाशं तथा चांकुशं
वंदे तावकमायुधं परशिवे चक्रांतराले स्थितं || 96 ||

त्रिकोण उदितप्रभे जगति सर्वसिद्धिप्रदे
युते त्रिपुरयांबया स्थितवती च कामेश्वरी |
तनोतु मम मंगलं सकलशर्म वज्रेश्वरी
करोतु भगमालिनी स्फुरतु मामके चेतसि || 97 ||

सर्वानंदमये समस्तजगतामाकांक्षिते बैंदवे
भैरव्या त्रिपुराद्यया विरचितावासे स्थिता सुंदरी |
आनंदोल्लसितेक्षणा मणिगणभ्राजिष्णुभूषांबरा
विस्फूर्जद्वदना परापररहः सा पातु मां योगिनी || 98 ||

उल्लसत्कनककांतिभासुरं
सौरभस्फुरणवासितांबरं |
दूरतः परिहृतं मधुव्रतै-
-रर्पयामि तव देवि चंपकं || 99 ||

वैरमुद्धतमपास्य शंभुना
मस्तके विनिहितं कलाच्छलात् |
गंधलुब्धमधुपाश्रितं सदा
केतकीकुसुममर्पयामि ते || 100 ||

चूर्णीकृतं द्रागिव पद्मजेन
त्वदाननस्पर्धिसुधांशुबिंबं |
समर्पयामि स्फुटमंजलिस्थं
विकासिजातीकुसुमोत्करं ते || 101 ||

अगरुबहलधूपाजस्रसौरभ्यरम्यां
मरकतमणिराजीराजिहारिस्रगाभां |
दिशि विदिशि विसर्पद्गंधलुब्धालिमालां
वकुलकुसुममालां कंठपीठेऽर्पयामि || 102 ||

ईंकारोर्ध्वगबिंदुराननमधोबिंदुद्वयं च स्तनौ
त्रैलोक्ये गुरुगम्यमेतदखिलं हार्दं च रेखात्मकं |
इत्थं कामकलात्मिकां भगवतीमंतः समाराधय-
-न्नानंदांबुधिमज्जने प्रलभतामानंदथुं सज्जनः || 103 ||

धूपं तेऽगरुसंभवं भगवति प्रोल्लासिगंधोद्धुरं
दीपं चैव निवेदयामि महसा हार्दांधकारच्छिदं |
रजस्वर्णविनिर्मितेषु परितः पात्रेषु संस्थापितं
नैवेद्यं विनिवेदयामि परमानंदात्मिके सुंदरि || 104 ||

जातीकोरकतुल्यमोदनमिदं सौवर्णपात्रे स्थितं
शुद्धान्नं शुचि मुद्गमाषचणकोद्भूतातथा सूपकाः |
प्राज्यं माहिषमाज्यमुत्तममिदं हैयंगवीनं पृथ-
-क्पात्रेषु प्रतिपादितं परशिवे तत्सर्वमंगीकुरु || 105 ||

शिंबीसूरणशाकबिंबबृहतीकूश्मांडकोशातकी-
-वृंताकानि पटोलकानि मृदुना संसाधितान्यग्निना |
संपन्नानि च वेसवारविसरैर्दिव्यानि भक्त्या कृता-
-न्यग्रे ते विनिवेदयामि गिरिजे सौवर्णपात्रव्रजे || 106 ||

निंबूकार्द्रकचूतकंदकदलीकौशातकीकर्कटी-
-धात्रीबिल्वकरीरकैर्विरचितान्यानंदचिद्विग्रहे |
राजीभिः कटुतैलसैंधवहरिद्राभिः स्थितान्पातये
संधानानि निवेदयामि गिरिजे भूरिप्रकाराणि ते || 107 ||

सितयांचितलड्डुकव्रजा-
-न्मृदुपूपान्मृदुलाश्च पूरिकाः |
परमान्नमिदं च पार्वति
प्रणयेन प्रतिपादयामि ते || 108 ||

दुग्धमेतदनले सुसाधितं
चंद्रमंडलनिभं तथा दधि |
फाणितं शिखरिणीं सितासितां
सर्वमंब विनिवेदयामि ते || 109 ||

अग्रे ते विनिवेद्य सर्वममितं नैवेद्यमंगीकृतं
ज्ञात्वा तत्त्वचतुष्टयं प्रथमतो मन्ये सुतृप्तां ततः |
देवीं त्वां परिशिष्टमंब कनकामत्रेषु संस्थापितं
शक्तिभ्यः समुपाहारामि सकलं देवेशि शंभुप्रिये || 110 ||

वामेन स्वर्णपात्रीमनुपमपरमान्नेन पूर्णां दधाना-
-मन्येन स्वर्णदर्वीं निजजनहृदयाभीष्टदां धारयंतीं |
सिंदूरारक्तवस्त्रां विविधमणिलसद्भूषणां मेचकांगीं
तिष्ठंतीमग्रतस्ते मधुमदमुदितामन्नपूर्णां नमामि || 111 ||

पंक्त्योपविष्टान्परितस्तु चक्रं
शक्त्या स्वयालिंगितवामभागान् |
सर्वोपचारैः परिपूज्य भक्त्या
तवांबिके पारिषदान्नमामि || 112 ||

परमामृतमत्तसुंदरी-
-गणमध्यस्थितमर्कभासुरं |
परमामृतघूर्णितेक्षणं
किमपि ज्योतिरुपास्महे परं || 113 ||

दृश्यते तव मुखांबुजं शिवे
श्रूयते स्फुटमनाहतध्वनिः |
अर्चने तव गिरामगोचरे
न प्रयाति विषयांतरं मनः || 114 ||

त्वन्मुखांबुजविलोकनोल्लस-
-त्प्रेमनिश्चलविलोचनद्वयीं |
उन्मनीमुपगतां सभामिमां
भावयामि परमेशि तावकीं || 115 ||

चक्षुः पश्यतु नेह किंचन परं घ्राणं न वा जिघ्रतु
श्रोत्रं हंत शृणोतु न त्वगपि न स्पर्शं समालंबतां |
जिह्वा वेत्तु न वा रसं मम परं युष्मत्स्वरूपामृते
नित्यानंदविघूर्णमाननयने नित्यं मनो मज्जतु || 116 ||

यस्त्वां पश्यति पार्वति प्रतिदिनं ध्यानेन तेजोमयीं
मन्ये सुंदरि तत्त्वमेतदखिलं वेदेषु निष्ठां गतं |
यस्तस्मिन्समये तवार्चनविधावानंदसांद्राशयो
यातोऽहं तदभिन्नतां परशिवे सोऽयं प्रसादस्तव || 117 ||

गणाधिनाथं वटुकं च योगिनीः
क्षेत्राधिनाथं च विदिक्चतुष्टये |
सर्वोपचारैः परिपूज्य भक्तितो
निवेदयामो बलिमुक्तयुक्तिभिः || 118 ||

वीणामुपांते खलु वादयंत्यै
निवेद्य शेषं खलु शेषिकायै |
सौवर्णभृंगारविनिर्गतेन
जलेन शुद्धाचमनं विधेहि || 119 ||

तांबूलं विनिवेदयामि विलसत्कर्पूरकस्तूरिका-
-जातीपूगलवंगचूर्णखदिरैर्भक्त्या समुल्लासितं |
स्फूर्जद्रत्नसमुद्गकप्रणिहितं सौवर्णपात्रे स्थितै-
-र्दीपैरुज्ज्वलमन्नचूर्णरचितैरारार्तिकं गृह्यतां || 120 ||

काचिद्गायति किंनरी कलपदं वाद्यं दधानोर्वशी
रंभा नृत्यति केलिमंजुलपदं मातः पुरस्तात्तव |
कृत्यं प्रोज्झ्य सुरस्त्रियो मधुमदव्याघूर्णमानेक्षणं
नित्यानंदसुधांबुधिं तव मुखं पश्यंति दृश्यंति च || 121 ||

तांबूलोद्भासिवक्त्रैस्त्वदमलवदनालोकनोल्लासिनेत्रै-
-श्चक्रस्थैः शक्तिसंघैः परिहृतविषयासंगमाकर्ण्यमानं |
गीतज्ञाभिः प्रकामं मधुरसमधुरं वादितं किंनरीभि-
-र्वीणाझंकारनादं कलय परशिवानंदसंधानहेतोः || 122 ||

अर्चाविधौ ज्ञानलवोऽपि दूरे
दूरे तदापादकवस्तुजातं |
प्रदक्षिणीकृत्य ततोऽर्चनं ते
पंचोपचारात्मकमर्पयामि || 123 ||

यथेप्सितमनोगतप्रकटितोपचारार्चितां
निजावरणदेवतागणवृतां सुरेशस्थितां |
कृतांजलिपुटो मुहुः कलितभूमिरष्टांगकै-
-र्नमामि भगवत्यहं त्रिपुरसुंदरि त्राहि मां || 124 ||

विज्ञप्तीरवधेहि मे सुमहता यत्नेन ते संनिधिं
प्राप्तं मामिह कांदिशीकमधुना मातर्न दूरीकुरु |
चित्तं त्वत्पदभावने व्यभिचरेद्दृग्वाक्च मे जातु चे-
-त्तत्सौम्ये स्वगुणैर्बधान न यथा भूयो विनिर्गच्छति || 125 ||

क्वाहं मंदमतिः क्व चेदमखिलैरेकांतभक्तैः स्तुतं
ध्यातं देवि तथापि ते स्वमनसा श्रीपादुकापूजनं |
कादाचित्कमदीयचिंतनविधौ संतुष्टया शर्मदं
स्तोत्रं देवतया तया प्रकटितं मन्ये मदीयानने || 126 ||

नित्यार्चनमिदं चित्ते भाव्यमानं सदा मया |
निबद्धं विविधैः पद्यैरनुगृह्णातु सुंदरी || 127 ||

इति श्रीमत्परमहंसपरिव्राजकाचार्यस्य श्रीगोविंदभगवत्पूज्यपादशिष्यस्य श्रीमच्छंकरभगवतः कृतौ त्रिपुरसुंदरी मानसपूजा स्तोत्रं |