श्री मातंगी अष्टोत्तरशतनाम स्तोत्रं

श्री मातंगी अष्टोत्तरशतनाम स्तोत्रं

श्रीभैरव्युवाच |
भगवन् श्रोतुमिच्छामि मातंग्याः शतनामकं |
यद्गुह्यं सर्वतंत्रेषु केनापि न प्रकाशितं || 1 ||

श्रीभैरव उवाच |
शृणु देवि प्रवक्ष्यामि रहस्यातिरहस्यकं |
नाख्येयं यत्र कुत्रापि पठनीयं परात्परं || 2 ||

यस्यैकवारपठनात्सर्वे विघ्ना उपद्रवाः |
नश्यंति तत्क्षणाद्देवि वह्निना तूलराशिवत् || 3 ||

प्रसन्ना जायते देवी मातंगी चास्य पाठतः |
सहस्रनामपठने यत्फलं परिकीर्तितं |
तत्कोटिगुणितं देवीनामाष्टशतकं शुभं || 4 ||

अस्य श्रीमातंग्यष्टोत्तरशतनामस्तोत्रस्य भगवान्मतंग ऋषिः अनुष्टुप्छंदः श्रीमातंगी देवता श्रीमातंगी प्रीतये जपे विनियोगः |

महामत्तमातंगिनी सिद्धिरूपा
तथा योगिनी भद्रकाळी रमा च |
भवानी भवप्रीतिदा भूतियुक्ता
भवाराधिता भूतिसंपत्करी च || 1 ||

धनाधीशमाता धनागारदृष्टि-
-र्धनेशार्चिता धीरवापी वरांगी |
प्रकृष्टा प्रभारूपिणी कामरूपा
प्रहृष्टा महाकीर्तिदा कर्णनाली || 2 ||

कराळी भगा घोररूपा भगांगी
भगाह्वा भगप्रीतिदा भीमरूपा |
भवानी महाकौशिकी कोशपूर्णा
किशोरी किशोरप्रिया नंदईहा || 3 ||

महाकारणाऽकारणा कर्मशीला
कपाली प्रसिद्धा महासिद्धखंडा |
मकारप्रिया मानरूपा महेशी
मलोल्लासिनी लास्यलीलालयांगी || 4 ||

क्षमा क्षेमशीला क्षपाकारिणी चा-
-ऽक्षयप्रीतिदा भूतियुक्ता भवानी |
भवाराधिता भूतिसत्यात्मिका च
प्रभोद्भासिता भानुभास्वत्करा च || 5 ||

धराधीशमाता धरागारदृष्टि-
-र्धरेशार्चिता धीवरा धीवरांगी |
प्रकृष्टा प्रभारूपिणी प्राणरूपा
प्रकृष्टस्वरूपा स्वरूपप्रिया च || 6 ||

चलत्कुंडला कामिनी कांतयुक्ता
कपालाऽचला कालकोद्धारिणी च |
कदंबप्रिया कोटरी कोटदेहा
क्रमा कीर्तिदा कर्णरूपा च काक्ष्मीः || 7 ||

क्षमांगी क्षयप्रेमरूपा क्षया च
क्षयाक्षा क्षयाह्वा क्षयप्रांतरा च |
क्षवत्कामिनी क्षारिणी क्षीरपूर्णा
शिवांगी च शाकंभरी शाकदेहा || 8 ||

महाशाकयज्ञा फलप्राशका च
शकाह्वाऽशकाह्वा शकाख्या शका च |
शकाक्षांतरोषा सुरोषा सुरेखा
महाशेषयज्ञोपवीतप्रिया च || 9 ||

जयंती जया जाग्रती योग्यरूपा
जयांगा जपध्यानसंतुष्टसंज्ञा |
जयप्राणरूपा जयस्वर्णदेहा
जयज्वालिनी यामिनी याम्यरूपा || 10 ||

जगन्मातृरूपा जगद्रक्षणा च
स्वधावौषडंता विलंबाऽविलंबा |
षडंगा महालंबरूपासिहस्ता-
पदाहारिणीहारिणी हारिणी च || 11 ||

महामंगळा मंगळप्रेमकीर्ति-
-र्निशुंभच्छिदा शुंभदर्पापहा च |
तथाऽऽनंदबीजादिमुक्तिस्वरूपा
तथा चंडमुंडापदा मुख्यचंडा || 12 ||

प्रचंडाऽप्रचंडा महाचंडवेगा
चलच्चामरा चामरा चंद्रकीर्तिः |
सुचामीकरा चित्रभूषोज्ज्वलांगी
सुसंगीतगीता च पायादपायात् || 13 ||

इति ते कथितं देवि नाम्नामष्टोत्तरं शतं |
गोप्यं च सर्वतंत्रेषु गोपनीयं च सर्वदा || 14 ||

एतस्य सतताभ्यासात्साक्षाद्देवो महेश्वरः |
त्रिसंध्यं च महाभक्त्या पठनीयं सुखोदयं || 15 ||

न तस्य दुष्करं किंचिज्जायते स्पर्शतः क्षणात् |
सुकृतं यत्तदेवाप्तं तस्मादावर्तयेत्सदा || 16 ||

सदैव सन्निधौ तस्य देवी वसति सादरं |
अयोगा ये त एवाग्रे सुयोगाश्च भवंति वै || 17 ||

त एव मित्रभूताश्च भवंति तत्प्रसादतः |
विषाणि नोपसर्पंति व्याधयो न स्पृशंति तान् || 18 ||

लूताविस्फोटकाः सर्वे शमं यांति च तत्क्षणात् |
जरापलितनिर्मुक्तः कल्पजीवी भवेन्नरः || 19 ||

अपि किं बहुनोक्तेन सान्निध्यं फलमाप्नुयात् |
यावन्मया पुरा प्रोक्तं फलं साहस्रनामकं |
तत्सर्वं लभते मर्त्यो महामायाप्रसादतः || 20 ||

इति श्रीरुद्रयामले श्रीमातंगीशतनामस्तोत्रं |