श्री श्यामला दंडकं

श्री श्यामला दंडकं

ध्यानं –
माणिक्यवीणामुपलालयंतीं
मदालसां मंजुलवाग्विलासां |
माहेंद्रनीलद्युतिकोमलांगीं
मातंगकन्यां मनसा स्मरामि || 1 ||

चतुर्भुजे चंद्रकळावतंसे
कुचोन्नते कुंकुमराग शोणे |
पुंड्रेक्षुपाशांकुशपुष्पबाण-
-हस्ते नमस्ते जगदेकमातः || 2 ||

माता मरकतश्यामा मातंगी मदशालिनी |
कुर्यात्कटाक्षं कळ्याणी कदंबवनवासिनी || 3 ||

जय मातंगतनये जय नीलोत्पलद्युते |
जय संगीतरसिके जय लीलाशुकप्रिये || 4 ||

दंडकं –
जय जननि सुधा समुद्रांतरुद्यन् मणिद्वीप संरूढ बिल्वाटवीमध्यकल्पद्रुमाकल्प कादंबकांतार वासप्रिये कृत्तिवासःप्रिये सर्वलोकप्रिये |

सादरारब्ध संगीत संभावना संभ्रमालोल नीपस्रगाबद्धचूली सनाथत्रिके सानुमत्पुत्रिके | शेखरीभूत शीतांशुरेखा मयूखावली बद्ध सुस्निग्ध नीलालकश्रेणिशृंगारिते लोकसंभाविते | कामलीला धनुःसन्निभ भ्रूलतापुष्प संदोह संदेह कृल्लोचने वाक्सुधासेचने | चारु गोरोचना पंक केली ललामाभिरामे सुरामे रमे | प्रोल्लसद्वालिका मौक्तिकश्रेणिका चंद्रिका मंडलोद्भासि लावण्यगंडस्थल न्यस्तकस्तूरिकापत्ररेखा समुद्भूत सौरभ्य संभ्रांत भृंगांगना गीतसांद्रीभवन्मंद्र तंत्रीस्वरे सुस्वरे भास्वरे | वल्लकी वादन प्रक्रिया लोल तालीदलाबद्धताटंक भूषाविशेषान्विते सिद्धसम्मानिते | दिव्य हालामदोद्वेल हेलालसच्चक्षुरांदोलन श्रीसमाक्षिप्त कर्णैक नीलोत्पले पूरिताशेष लोकाभिवांछा फले श्रीफले | स्वेद बिंदूल्लसत्फाल लावण्य निष्यंद संदोह संदेहकृन्नासिका मौक्तिके सर्वविश्वात्मिके कालिके | मुग्ध मंदस्मितोदार वक्त्रस्फुरत्पूग तांबूलकर्पूर खंडोत्करे ज्ञानमुद्राकरे सर्वसंपत्करे पद्मभास्वत्करे | कुंदपुष्पद्युति स्निग्ध दंतावली निर्मलालोल कल्लोल सम्मेलन स्मेरशोणाधरे चारुवीणाधरे पक्वबिंबाधरे |

सुललित नवयौवनारंभ चंद्रोदयोद्वेल लावण्य दुग्धार्णवाविर्भवत्कंबुबिब्बोक भृत्कंधरे सत्कलामंदिरे मंथरे | दिव्यरत्नप्रभा बंधुरच्छन्न हारादिभूषा समुद्योतमानानवद्यांशु शोभे शुभे | रत्नकेयूर रश्मिच्छटा पल्लवप्रोल्लसद्दोर्लता राजिते योगिभिः पूजिते | विश्वदिङ्मंडलव्यापि माणिक्यतेजः स्फुरत्कंकणालंकृते विभ्रमालंकृते साधकैः सत्कृते | वासरारंभ वेला समुज्जृंभमाणारविंद प्रतिद्वंद्विपाणिद्वये संततोद्यद्दये अद्वये | दिव्य रत्नोर्मिकादीधिति स्तोमसंध्यायमानांगुली पल्लवोद्यन्नखेंदु प्रभामंडले सन्नताखंडले चित्प्रभामंडले प्रोल्लसत्कुंडले | तारकाराजिनीकाश हारावलिस्मेर चारुस्तनाभोग भारानमन्मध्यवल्लीवलिच्छेद वीचीसमुल्लास संदर्शिताकार सौंदर्य रत्नाकरे वल्लकीभृत्करे किंकर श्रीकरे | हेमकुंभोपमोत्तुंग वक्षोज भारावनम्रे त्रिलोकावनम्रे | लसद्वृत्त गंभीर नाभी सरस्तीर शैवाल शंकाकर श्याम रोमावलीभूषणे मंजु संभाषणे | चारु शिंजत्कटी सूत्र निर्भर्त्सितानंग लीला धनुः शिंजिनीडंबरे दिव्यरत्नांबरे |
पद्मरागोल्लसन्मेखला भास्वर श्रोणि शोभा जित स्वर्णभूभृत्तले चंद्रिकाशीतले |

विकसित नव किंशुकाताम्र दिव्यांशुकच्छन्न चारूरुशोभा पराभूतसिंदूर शोणायमानेंद्र मातंग हस्तार्गले वैभवानर्गले श्यामले | कोमल स्निग्ध नीलोपलोत्पादितानंग तूणीर शंकाकरोदार जंघालते चारुलीलागते | नम्र दिक्पाल सीमंतिनी कुंतल स्निग्ध नील प्रभा पुंज संजात दूर्वांकुराशंक सारंग संयोग रिंखन्नखेंदूज्ज्वले प्रोज्ज्वले निर्मले | प्रह्व देवेश लक्ष्मीश भूतेश तोयेश वाणीश कीनाश दैत्येश यक्षेश वाय्वग्निकोटीर माणिक्य संघृष्ट बालातपोद्दाम लाक्षारसारुण्य तारुण्य लक्ष्मीगृहीतांघ्रि पद्मे सुपद्मे उमे |

सुरुचिर नवरत्न पीठस्थिते सुस्थिते | रत्नपद्मासने रत्नसिंहासने शंखपद्मद्वयोपाश्रिते | तत्र विघ्नेश दुर्गा वटु क्षेत्रपालैर्युते | मत्तमातंग कन्यासमूहान्विते मंजुला मेनकाद्यंगना मानिते भैरवैरष्टभिर्वेष्टिते | देवि वामादिभिः शक्तिभिः सेविते | धात्रिलक्ष्म्यादि शक्त्यष्टकैः संयुते | मातृकामंडलैर्मंडिते | यक्ष गंधर्व सिद्धांगना मंडलैरर्चिते | पंचबाणात्मिके | पंचबाणेन रत्या च संभाविते | प्रीतिभाजा वसंतेन चानंदिते | भक्तिभाजां परं श्रेयसे कल्पसे | योगिनां मानसे द्योतसे | छंदसामोजसा भ्राजसे | गीतविद्या विनोदातितृष्णेन कृष्णेन संपूज्यसे | भक्तिमच्चेतसा वेधसा स्तूयसे | विश्वहृद्येन वाद्येन विद्याधरैर्गीयसे |

श्रवणहरण दक्षिणक्वाणया वीणया किन्नरैर्गीयसे | यक्ष गंधर्व सिद्धांगना मंडलैरर्च्यसे | सर्वसौभाग्यवांछावतीभिर्वधूभिः सुराणां समाराध्यसे | सर्वविद्याविशेषात्मकं चाटुगाथासमुच्चारणं कंठमूलोल्लसद्वर्णराजित्रयं कोमलश्यामलोदारपक्षद्वयं तुंडशोभातिदूरीभवत्किंशुकं तं शुकं लालयंती परिक्रीडसे | पाणिपद्मद्वयेनाक्षमालामपि स्फाटिकीं ज्ञानसारात्मकं पुस्तकं चांकुशं पाशमाबिभ्रती येन संचिंत्यसे तस्य वक्त्रांतरात् गद्यपद्यात्मिका भारती निस्सरेत् | येन वा यावकाभाकृतिर्भाव्यसे तस्य वश्या भवंति स्त्रियः पूरुषाः | येन वा शातकुंभद्युतिर्भाव्यसे सोऽपि लक्ष्मीसहस्रैः परिक्रीडते | किं न सिद्ध्येद्वपुः श्यामलं कोमलं चंद्रचूडान्वितं तावकं ध्यायतः | तस्य लीलासरो वारिधिः, तस्य केलीवनं नंदनं, तस्य भद्रासनं भूतलं, तस्य गीर्देवता किंकरी, तस्य चाज्ञाकरी श्रीः स्वयं | सर्वतीर्थात्मिके, सर्वमंत्रात्मिके, सर्वतंत्रात्मिके, सर्वयंत्रात्मिके, सर्वपीठात्मिके, सर्वतत्त्वात्मिके, सर्वशक्त्यात्मिके, सर्वविद्यात्मिके, सर्वयोगात्मिके, सर्वनादात्मिके, सर्वशब्दात्मिके, सर्वविश्वात्मिके, सर्वदीक्षात्मिके, सर्वसर्वात्मिके, सर्वगे, पाहि मां पाहि मां पाहि मां, देवि तुभ्यं नमो, देवि तुभ्यं नमो, देवि तुभ्यं नमः ||

इति श्रीकाळिदास कृत श्री श्यामला दंडकं |