श्री महालक्ष्मी स्तवः

मयि कुरु मंगलमंबुजवासिनि मंगलदायिनि मंजुगते
    मतिमलहारिणि मंजुळभाषिणि मन्मथतातविनोदरते ।
मुनिजनपालिनि मौक्तिकमालिनि सद्गुणवर्षिणि साधुनुते
    जय जय हे मधुसूदनमोहिनि मोदविधायिनि वेदनुते ॥1॥

कलिमलहारिणि कामितदायिनि कांतविधायिनि कांतहिते
    कमलदलोपम कम्रपदद्वय शिंजितनूपुर नादयुते ।
कमलसुमालिनि कांचनहारिणि लोकसुखैषिणि कामिनुते
    जय जय हे मधुसूदनमोहिनि मोदविधायिनि वेदनुते ॥2॥

कुवलयमोचकनेत्रकृपापरिपालित संश्रितभक्तकुले
    गुरुवर शंकरसन्नुतितुष्टिसुवृष्टसुहेममयामलके ।
रविकुलवारिधिचंद्रसमादरमंत्रगृहीतसुपाणितले
    जय जय हे मधुसूदनमोहिनि मोदविधायिनि वेदनुते ॥3॥

कुलललनाकुललाळितलोलविलोचनपूर्णकृपाकमले
    चलदळकावलिवारिदमध्यगचंद्रसुनिर्मलफालतले ।
मणिमयभासुरकर्णविभूषणकांतिपरिष्कृतगंडतले
    जय जय हे मधुसूदनमोहिनि मोदविधायिनि वेदनुते ॥4॥

सुरगणदानवमंडललोहितसागरसंभवदिव्यतनो
    सकलसुरासुरदेवमुनीनतिहाय च दोषदृशाहि रमे ।
गुणगणवारिधिनाथमहोरसिदत्तसुमावलिजातमुदे
    जय जय हे मधुसूदनमोहिनि मोदविधायिनि वेदनुते ॥5॥

कनकघटोपमकुंकुमशोभित हारसुरंजित दिव्यकुचे
    कमलजपूजित कुंकुमपंगिल कांतपदद्वयतामरसे ।
करधृतकंजसुमे कटिवीतदूकुलमनोहरकांतिवृते
    जय जय हे मधुसूदनमोहिनि मोदविधायिनि वेदनुते ॥6॥

सुरपतिपूजनदत्तमनोहरचंदनकुंकुमसंवलिते
    सुरयुवतीकृतवादननर्तनवीजनवंदनसम्मुदिते ।
निजरमणारुणपादसरोरुहमर्दनकल्पनतोषयुते
    जय जय हे मधुसूदनमोहिनि मोदविधायिनि वेदनुते ॥7॥

दिनमणिसन्निभदीपसुदीपित रत्नसमावृतदिव्यगृहे
    सुतधनधान्यमुखाभिधलक्ष्म्यभिसंवृतकांतगृहीतकरे ।
निजवनपूजन दिव्यसुमार्चन वंदनकल्पितभर्तृमुदे
    जय जय हे मधुसूदनमोहिनि मोदविधायिनि वेदनुते ॥8॥

मम हृदिवास पराभवतापमपाकुरु देहि मुदं हि रमे
    मयि करुणां कुरु सादरवीक्षणमर्थिजने दिश चारुतनो ।
सकृतभिवीक्षणजातमहोदयशक्रमुखाखिलदेवगणे
    जय जय हे मधुसूदनमोहिनि मोदविधायिनि वेदनुते ॥9॥

सुतधनमौक्तिकहैमनिवेशितरत्नसुभूषण दानरते
    रथगजवाजिसमावृतमंदिरराज्यसुकल्पनकल्पलते ।
कुसुमसुचंदनवस्त्रमनोहररूपकलारतिपोषरते
    जय जय हे मधुसूदनमोहिनि मोदविधायिनि वेदनुते ॥10॥

धिमि धिमि धिंधिमि धिंधिमि धिंधिमि दुंदुभिनादसुपूर्णदिशे
    घुम घुम घुंघुम घुंघुम घुंघुम शंखनिनादसुतुष्टिवशे ।
नटनकलापटुदेवनटीकुलचंक्रमनर्तनदत्तदृशे
    जय जय हे मधुसूदनमोहिनि मोदविधायिनि वेदनुते ॥11॥

हरिहरपूजनमद्भुतभाषणमष्टसुसिद्धिमुपानय मे
    मधुकृतपायसमुद्गकृतौदनभक्ष्यनिवेदनतुष्टमते ।
सकलसुमार्पणपूजनसंभ्रमदेववधूकुलसंवलिते
    जय जय हे मधुसूदनमोहिनि मोदविधायिनि वेदनुते ॥12॥

अनवधिमंगलमार्तिविनाशनमच्युतसेवनमंब रमे
    निखिलकलामतिमास्तिकसंगममिंद्रियपाटवमर्पय मे ।
अमितमहोदयमिष्टसमागममष्टसुसंपदमाशु मम
    जय जय हे मधुसूदनमोहिनि मोदविधायिनि वेदनुते ॥13॥

करधृतशुक्लसुमावलिनिर्मितहारगजीवृतपार्श्वतले
    कमलनिवासिनि शोकविनाशिनि दैवसुवासिनि लक्ष्म्यभिदे ।
निजरमणारुणचंदनचर्चितचंपकहारसुचारुगले
    जय जय हे मधुसूदनमोहिनि मोदविधायिनि वेदनुते ॥14॥

अनघमनंतपदान्वितरामसुदीक्षितसत्कृतपद्यमिदं
    पठति शृणोति च भक्तियुतो यदि भाग्यसमृद्धिमथो लभते ।
द्विजवरदेशिकसन्नुतितुष्टरमे परिपालय लोकमिमं
    जय जय हे मधुसूदनमोहिनि मोदविधायिनि वेदनुते ॥15॥

इति श्री अनंतरामदीक्षितेन विरचितः श्रीमहालक्ष्मीस्तवः संपूर्णः ।